தமிழக காங்கிரஸின் புதிய தலைவராக கே.எஸ்.அழகிரி வரும் 8-ம் தேதி பொறுப்பேற்பு

தமிழகத்தில் நரேந்திர மோடி ஆட்சிக்கு எதிராக கடும் கோபத்துடன் மக்கள் கொதித்தெழுந்து தங்களது எதிர்ப்புகளை பல்வேறு வடிவங்களில் வெளிப்படுத்தி வருகின்றனர். இந்தியாவிலேயே ஒரு மாநிலத்தில் பாஜகவோடு கூட்டணி வைப்பதற்கு எந்த ஒரு கட்சியும் முன்வராத ஒரு சூழல் தமிழகத்திலே நிலவி வருகிறது. இந்தப் பின்னணியில் மாநிலத்தில் நடைபெற்று வரும் அராஜக ஊழல் ஆட்சிக்கு முடிவு கட்ட வேண்டிய பொறுப்பு ஜனநாயக சக்திகளுக்கு இருக்கிறது. இதை திமுக தலைமையிலான மதச்சார்பற்ற கூட்டணியில் காங்கிரஸ் உள்ளிட்ட கட்சிகளை ஒருங்கிணைத்து செயல்படுத்தி வருகின்றன. இந்த அரிய பணியை திமுகவின் தலைவர் மு.க. ஸ்டாலின் மிகச் சிறப்பாக செயல்படுத்தி வருகிறார்.

சமீபத்தில் மறைந்த திமுக தலைவர் கருணாநிதியின் திருவுருவச் சிலை திறப்பு விழாவுக்கு வருகை புரிந்த காங்கிரஸ் தலைவர் ராகுல்காந்தியை மேடையில் வைத்துக் கொண்டு மு.க. ஸ்டாலின் எதிர்கால பிரதமராக அவரை முன்மொழிந்து எதிர்கால வெற்றிக்கு முன்னோட்டமாக அறிவிப்பை வெளியிட்டார். இதற்காக காங்கிரஸ் கட்சி நன்றி பாராட்ட கடமைப்பட்டிருக்கிறது. இதன்மூலம் தமிழகம், புதுச்சேரி உள்ளிட்ட 40 தொகுதிகளிலும் திமுக - காங்கிரஸ் கூட்டணி வெற்றி பெறுகிற அரிய வாய்ப்பு இன்றைக்கு உருவாகியிருக்கிறது.

இத்தகைய அரசியல் சூழலில் சாதாரண தொண்டராக இருந்த என்னை பெரியார், காமராஜர், மூப்பனார் ஆகியோர் அமர்ந்து பெருமை சேர்த்த தமிழ்நாடு காங்கிரஸ் கமிட்டி தலைவர் பதவியில் நியமித்த தலைவர் ராகுல்காந்திக்கு என் நெஞ்சார்ந்த நன்றியை தெரிவித்துக் கொள்கிறேன். அதேபோல, சோனியா காந்தியின் வாழ்த்துக்களை பெறுவதை பாக்கியமாக கருதுகிறேன். மேலும் அகில இந்திய காங்கிரஸ் கமிட்டி பொதுச்செயலாளர் முகுல் வாஸ்னிக்குக்கும் எனது நன்றியை தெரிவிக்க கடமைப்பட்டிருக்கிறேன்.

இந்தியாவின் எதிர்கால பிரதமராக ராகுல்காந்தியை அமர்த்துகிற இமாலயப் பணியில் தமது பங்களிப்பை செய்வதற்கு காங்கிரஸ் கட்சியினர் அல்லும் பகலும் அயராது உழைக்க வேண்டிய சூழல் இன்றைக்கு உருவாகியிருக்கிறது. இந்தப் பணியை செய்து முடிப்பதற்காக நமக்கு 100 நாட்கள் கூட இல்லை. கண் துஞ்சாது, அயராது, கடமை உணர்வோடு உழைப்பதன் மூலமே நமது வெற்றிகளைப் பெற முடியும்.

எனவே, தமிழ்நாடு காங்கிரஸ் கமிட்டி தலைவராக 8.2.2019 வெள்ளிக்கிழமை மாலை 3 மணியளவில் சென்னை சத்தியமூர்த்தி பவனில் அகில இந்திய காங்கிரஸ் கமிட்டி செயலாளர்களும், தமிழக காங்கிரஸ் பொறுப்பாளர்களுமான சஞ்ஜய் தத், சிரிவல்லபிரசாத் மற்றும் சட்டப்பேரவை காங்கிரஸ் கட்சித் தலைவர் கே.ஆர். ராமசாமி ஆகியோர் முன்னிலையில் பொறுப்பேற்க இருக்கிறேன். என்னோடு செயல் தலைவர்களாக நியமிக்கப்பட்டுள்ள ஹெச். வசந்தகுமார், கே. ஜெயக்குமார், டாக்டர் எம்.கே. விஷ்ணுபிரசாத், மயூரா ஜெயக்குமார் ஆகியோரும் பொறுப்பேற்க இருக்கிறார்கள். இவ்விழாவில் தமிழ்நாடு காங்கிரஸ் கமிட்டி முன்னாள் தலைவர்கள், அகில இந்திய காங்கிரஸ் கமிட்டி செயலாளர்கள், முன்னாள் மத்திய அமைச்சர்கள், மாநில நிர்வாகிகள், மாவட்ட காங்கிரஸ் தலைவர்கள், பல்வேறு பிரிவுகளின் தலைவர்கள் மற்றும் பெருந்திரளான காங்கிரஸ் செயல்வீரர்கள் பங்கேற்க இருக்கிறார்கள்.

தமிழ்நாடு காங்கிரஸ் கமிட்டி தலைவராக, செயல் தலைவர்களாக பொறுப்பேற்க இருக்கிற இவ்விழாவில் காங்கிரஸ் கட்சியின் செயல்வீரர்கள் பெருமளவில் பங்கேற்க வேண்டுமென அன்போடு அழைக்கிறேன். தொண்டனாக இருந்த நான் தலைவராக பொறுப்பேற்கிற அவ்விழாவிலே ஆயிரக்கணக்கான தொண்டர்களுடைய அன்பையும், வாழ்த்துக்களையும் பெறுவதை மிகுந்த ஆவலுடன் எதிர்பார்க்கிறேன். உங்களது வாழ்த்துக்களை பெறவும், அதன்மூலம் காங்கிரஸ் கட்சிக்கு உத்வேகமும், வலிமையும் உருவாக்கி புதிய சகாப்தம் படைக்க காங்கிரஸ் செயல்வீரர்களே, சத்தியமூர்த்தி பவனை நோக்கி அணி திரண்டு வாருங்கள் என அன்போடு அழைக்கிறேன்" என கே.எஸ். அழகிரி தெரிவித்துள்ளார்.