சக மாணவர்கள் கிண்டல் செய்ததால் 5 மாணவிகள் தற்கொலை முயற்சி

சக மாணவர்கள் கிண்டல் செய்ததால், சங்கராபுரம் அருகே அரசு உண்டு உறைவிடப் பள்ளியில் 7-ம் வகுப்பு பயிலும் 5 மாணவிகள் எலி மருந்தைச் சாப்பிட்டு தற்கொலைக்கு முயன்றனர்.

விழுப்புரம் மாவட்டம் சங்கராபுரத்தை அடுத்துள்ளது அரசம்பட்டி கிராமம். இங்குள்ள அரசு உண்டு உறைவிட நடுநிலைப்பள்ளியில் 7-ம் வகுப்பில் 35 மாணவ, மாணவியர் பயில்கின்றனர்.

இருபாலர் பயிலும் இப்பள்ளியில், மாணவிகள் சிலரை மற்ற மாணவர்களுடன் தொடர்புபடுத்தி, ஒரு சில மாணவர்கள் வகுப்பறை கரும்பலகையில் கிண்டல் செய்து எழுதினர். கடந்த 12-ம் தேதி இச்சம்பவம் நடந்துள்ளது.

இதைக் கண்ட மாணவிகள் 5 பேர் மனமுடைந்து, பள்ளியின் இடைவேளையிலேயே வீட்டுக்குச் சென்று எலி மருந்தை சாப்பிட்டுள்ளனர். சிறிது நேரத்தில் அவர்கள் வாந்தி எடுக்கவும், பெற்றோர் அவர்களை சங்கராபுரம் அரசு மருத்துவமனைக்கு அழைத்துச் சென்றனர். அங்கு சிகிச்சையளிக்கப்பட்டு வீடு திரும்பியுள்ளனர்.

பின்னர் நேற்று முன்தினம் மீண்டும் 5 பேருக்கும் வயிற்றுவலி, வாந்தி ஏற்படவும்,  பெற்றோர் அவர்களை கள்ளக்குறிச்சி அரசு மருத்துவமனைக்கு அழைத்துச் சென்றனர். அங்கு சிகிச்சை அளிக்கப்பட்ட நிலையில், இரவில் மேல் சிகிச்சைக்காக விழுப்புரம் -  முண்டியம்பாக்கம் அரசு மருத்துவமனையில் 5 மாணவிகளும் அனுமதிக்கப்பட்டனர்.  தொடர்ந்து அங்கு சிகிச்சை அளிக்கப்பட்டு வருகிறது.

இது தொடர்பாக வழக்குப்பதிவு செய்துள்ள சங்கராபுரம் போலீஸார் மற்றும் சமூக நலத்துறை வட்டடாட்சியர் விஜய பிரபாகரன் ஆகியோர் தலைமையாசிரியர், ஆசிரியர் மற்றும் பெற்றோரிடம் விசாரணை நடத்தி வருகின்றனர்.