இப்போது 3 நாளில் முடிகிறது என்றால் ஜல்லிக்கட்டுக்காக 3 ஆண்டுகளாக அவசர சட்டம் கொண்டு வராதது ஏன்?- சட்டப்பேரவையில் ஸ்டாலின் கேள்வி

தற்போது 3 நாட்களில் ஜல்லிக் கட்டுக்கு அவசரச் சட்டம் கொண்டு வந்த அரசு, கடந்த 3 ஆண்டுகளாக அதைச் செய்யாதது ஏன்? என்று சட்டப்பேரவையில் எதிர்க்கட்சித் தலைவர் மு.க.ஸ்டாலின் கேள்வி எழுப்பினார்.

சட்டப்பேரவையில் ஆளுநர் உரைக்கு நன்றி தெரிவிக்கும் தீர்மானத்தின் மீது நேற்று நடந்த விவாதம்:

பி.மூர்த்தி (திமுக):

அதிமுக ஆட்சியில்தான் ரேக்ளா ரேஸ் மற்றும் ஜல்லிக்கட்டுக்கு தடை விதிக்கப்பட்டது.

முதல்வர் ஓ.பன்னீர்செல்வம்:

அரசு விதிக்கவில்லை; தடை விதித்தது நீதிமன்றம்தான். கடந்த 2006-ல் நீதிமன்றத்தில் தடை விதிக்கப்பட்டபோது, மறைந்த முன்னாள் முதல்வர் ஜெயலலிதா தொடர்ந்து மத்திய அரசுக்கு கோரிக்கை விடுத்து வற்புறுத்தி வந்தார். தற்போது பிரதமரைச் சந்தித்து மாநில அளவில் சட்டத்திருத்தம் கொண்டுவரப்பட்டு, பல்வேறு பகுதிகளில் ஜல்லிக்கட்டு நடந்து வருகிறது.

மு.க.ஸ்டாலின் (எதிர்க்கட்சித் தலைவர்):

திமுக ஆட்சியின் போது தடை விதிக்கப்பட்டாலும், தொடர்ந்து ஜல்லிக்கட்டு போட் டியை நடத்தி வந்தோம். தற்போது 3 நாட்களில் முயற்சி எடுத்து அவசரச் சட்டம் கொண்டு வந்த நீங்கள், 3 ஆண்டுகளாக அவசரச் சட்டத்தை இயற்றாதது ஏன்?

முதல்வர் ஓ.பன்னீர்செல்வம்:

திமுக ஆட்சியின்போது கொண்டு வரப்பட்ட சட்டத்தால் 2014 வரை ஜல்லிக்கட்டு நடந்தது. அதன்பின் தடை விதிக்கப்பட்டதால், பிரத மருக்கு தொடர்ந்து கடிதம் மூலம் கோரிக்கை விடுக்கப்பட்டது.

சட்டத்திருத்தம்

இதன் விளைவாகத்தான் கடந்த 2016-ல் மத்திய சுற்றுச்சூழல் மற்றும் வனத்துறை ஜல்லிக்கட்டு நடத்த அனுமதி அளித்தது. அதையும் உச்ச நீதிமன்றம் தடை செய்தது. அதன்பின் தற் போது சட்டத்திருத்தம் கொண்டு வரப்பட்டுள்ளது.

இவ்வாறு விவாதம் நடந்தது.