செய்தித்துளிகள்: ரஷ்ய அணி தோல்வி

* ரியல் மாட்ரிட் கால்பந்து அணியின் பயிற்சியாளர் பதவியில் இருந்து ஷினேடின் ஷிடேன் விலகி உள்ளார். இவரது தலைமையில் ரியல் மாட்ரிட் அணி தொடர்ச்சியாக 3 முறை சாம்பியன்ஸ் லீக் தொடரில் சாம்பியன் பட்டம் வென்றிருந்தது என்பது குறிப்பிடத்தக்கது.

* உலகக் கோப்பை கால்பந்து தொடர் வரும் 14-ம் தேதி தொடங்க உள்ள நிலையில் இந்தத் தொடரை நடத்தும் ரஷ்ய அணி, நட்புரீதியலான ஆட்டத்தில் ஆஸ்திரியாவிடம் 1-0 என்ற கோல் கணக்கில் தோல்வியடைந்தது.

* புரோ கபடி லீக் தொடரின் வீரர்கள் ஏலத்தில் 2-வது நாளான நேற்று ரைடரான பிரஷாந்த் குமார் ராயை ரூ.79 லட்சத்துக்கு யுபி யோதாஸ் அணி ஏலம் எடுத்தது. மற்றொரு ரைடரான சந்திரன் ரஞ்ஜித்தை ரூ.61.25 லட்சத்துக்கு தபாங் டெல்லி அணி வளைத்து போட்டது.

* கோல்டு கோஸ்ட் காமன்வெல்த் போட்டியில் பளுதூக்குதலில் தங்கப் பதக்கம் வென்ற இந்திய வீராங்கனையான சஞ்ஜிதா சானு ஊக்க மருந்து சோதனையில் சிக்கி உள்ளார். இதையடுத்து அவர் உடனடியாக சஸ்பெண்ட் செய்யப்பட்டுள்ளார்.

* நெதர்லாந்தில் வரும் 23-ம் தேதி சாம்பியன்ஸ் டிராபி ஹாக்கி தொடர் நடைபெறுகிறது. இந்தத் தொடருக்கான இந்திய அணிக்கு கோல்கீப்பரான பி.ஆர்.ஸ்ரீஜேஷ் கேப்டனாக நியமிக்கப்பட்டுள்ளார். முன்னாள் கேப்டனான சர்தார் சிங்குக்கும் அணியில் இடம் வழங்கப்பட்டுள்ளது.