டெஸ்ட் இன்னிங்ஸில் அதிக சிக்சர் விளாசல்: ஆஸி. சாதனையை உடைத்த நியூசிலாந்து

பாகிஸ்தானுக்கு எதிராக ஷார்ஜாவில் நடைபெற்று வரும் 3-வது டெஸ்ட் போட்டியில் நியூசிலாந்து அணி தன் முதல் இன்னிங்ஸில் மொத்தம் 19 சிக்சர்களை அடித்து புதிய சாதனை நிகழ்த்தியுள்ளது.

இதற்கு முன்பாக ஜிம்பாவே அணிக்கு எதிராக 2003-ஆம் ஆண்டு பெர்த் டெஸ்ட் போட்டியில் ஒரு இன்னிங்ஸில் 17 சிக்சர்களை ஆஸ்திரேலிய அணி அடித்திருந்ததே சாதனையாக இருந்தது.

இந்த இன்னிங்ஸில் நியூசி. அடித்த 19 சிக்சர்களில் 11 சிக்சர்கள் பிரெண்டன் மெக்கல்லம் அடித்தது. ராஸ் டெய்லர், கோரி ஆண்டர்சன், டிம் சவுதீ ஆகியோர் தலா 2 சிக்சர்கள் அடித்தனர். வில்லியம்சன், கிரெய்க் ஆகியோர் தலா 1 சிக்சர் அடிக்க மொத்தம் 19 சிக்சர்கள் விளாசப்பட்டது.

இந்திய அணி மும்பையில் 2009-ஆம் ஆண்டு இலங்கைக்கு எதிராக 15 சிக்சர்களை ஒரு இன்னிங்ஸில் அடித்து 4-ஆம் இடத்தில் உள்ளது. பாகிஸ்தான் அணி நியூசிலாந்துக்கு எதிராக 2002ஆம் ஆண்டு லாகூர் டெஸ்ட் போட்டியில் 15 சிக்சர்களை அடித்திருந்தது என்பது குறிப்பிடத்தக்கது.