ஆஸி. ஓபன் இரட்டையர் ஆட்டங்களில் பயஸ், போபண்ணா, சானியா மிர்சா தோல்வி

ஆஸ்திரேலிய ஓபன் கிராண்ட் ஸ்லாம் டென்னிஸ் இரட்டையர் போட்டிகளில் இன்று இந்தியாவுக்கு பெரும் ஏமாற்றமே கிடைத்தது. பயஸ், போபண்ணா, சானியா மிர்சா ஆகியோர் தோல்வி தழுவி வெளியேறினர்.

சமீபத்தில் சானியா மிர்சா இரட்டையர் தரவரிசையில் 5-ஆம் இடத்தைத் தொட்டார். இன்று 2-வது சுற்று மகளிர் ஆட்டத்தில் சானியா மிர்சா, சீன தைபே வீராங்கனை சூ-வெய்-சிய ஆகியோருக்கு தரவரிசை அளிக்கப்படாத கனடா-போலந்து ஜோடியான காப்ரியலா டாப்ரோவ்ஸ்கி, அலிசியா ரொசோல்ஸ்கா அதிர்ச்சி மருத்துவம் அளித்தனர். இதனையடுத்து சானியா ஜோடி 6-7, 4-6 என்று நேர் செட்களில் தோல்வி தழுவி வெளியேறியது.

ஆனால் கலப்பு இரட்டையர் பிரிவில் சானியா-புரூனோ சோரேஸ் இணை வென்றுள்ளது குறிப்பிடத்தக்கது.

முதல் சுற்றில் நம்பிக்கை அளித்த போபண்ணா-டேனியல் நெஸ்டர் இணை இன்று 2-வது சுற்றில் பெலிசியானோ லோபஸ்-மாக்ஸ் மிரிண்யி இணையிடம் 5-7, 3-6 என்ற நேர் செட்களில் படு தோல்வி தழுவி வெளியேறியது.

மற்றொரு ஆடவர் இரட்டையர் ஆட்டத்தில் லியாண்டர் பயஸ் இவரது தென் ஆப்பிரிக்க சக வீரர் ராவென் கிளாசன் 6-2, 4-6, 1-6 என்ற செட்களில் சைமன் போலெலி ஃபேபியோ ஃபாக்னீனி என்ற ஜோடியிடம் தோல்வி தழுவியது.