அன்றாட வாழ்வில் வேதியியல் 23: வானில் பறக்கும் விண் தந்த தனிமம்

பிப்பெட்: பொதுத் தேர்வெல்லாம் பரபரப்பா போயிக்கிட்டு இருக்கு பியூ.

பியூரெட்: ஆமா, உனக்கு எப்போ பரீட்சை?

பிப்.: நமக்கு இன்னும் பொதுத் தேர்வு எழுதுற வயசெல்லாம் வரலப்பா.

பியூ.: நான் அடுத்த வருசம் எழுதியாகணும். இந்தா நீ பரீட்சை எழுதுறதுக்கு, உனக்கு ஒரு புது மை பேனா.

பிப்.: ஹை! ரொம்ப நல்லா இருக்கே.

பியூ.: இப்பல்லாம் யாரு மை பேனால எழுதுறா? எல்லாம் பால்பாயின்ட்தான்.

பிப்.: ஆனாலும் மை பேனால எழுதுறது தனி அழகுதான்.

பியூ.: உண்மைதான், இந்த பார்க்கர் ஃபவுன்டென் பேனாவைப் பார்த்திருக்கியா?

பிப்.: அதெல்லாம் நம்மால வாங்க முடியுமா? யாராவது பரிசு தந்தா உண்டு.

பியூ.: அந்தப் பேனாவின் ‘நிப்' ரொம்ப விசேஷம். முன்னாடி இந்த ‘நிப்’பை இரிடியம் தனிமத்தைச் சேர்த்துத் தயாரிச்சாங்க. ஆனா இன்னைக்கு இரிடியம் சேர்க்கிறது இல்ல.

பிப்.: அப்ப எதை வெச்சுத் தயாரிக்கறாங்க?

பியூ.: ரூதேனியம், ஆஸ்மியம், டங்க்ஸ்டன் தனிமங்களை வெச்சு.

பிப்.: நாம இன்னைக்கு எந்தத் தனிமத்தைப் பத்திப் பேசப் போறோம்?

பியூ.: சொல்றேன். நைட்ரிக் அமிலமும் ஹைட்ரோகுளோரிக் அமிலமும் கலந்த ‘ராஜ திராவகம்’ எதையும் கரைச்சிடும்னு சொல்வாங்க.

பிப்.: நானும் கேள்விப்பட்டிருக்கேன்.

பியூ.: ஆங்கிலேய விஞ்ஞானி ஸ்மித்சன் டென்னன்ட் பொ.ஆ. 1803-ல் பிளாட்டினத்தை ராஜ திராவகத்துல கரைச்சார்.

பிப்.: அப்புறம் என்ன ஆச்சு?

பியூ.: அடர் நிற திரவம் கிடைச்சது. ராஜ திராவகத்திலேயே கரையாத சில எச்சங்களும் இருந்துச்சு.

பிப்.: அது என்ன?

பியூ.: அந்த எச்சத்துல ரெண்டு வேதிப்பொருட்கள் இருக்கிறத டென்னன்ட் கண்டறிஞ்சார். அந்த ரெண்டும்தான் ஆஸ்மியமும் இரிடியமும்.

பிப்.: இரிடியம்னு எதுக்கு அதுக்குப் பேரு வெச்சாரு?

பியூ.: கிரேக்கப் புராணப்படி வானவில்லுக்கான கடவுள் ஐரிஸ். இரிடியத்தின் உப்புகள் பிரகாசமான, பல்வேறுபட்ட நிறங்களோட இருந்துச்சு. ரெண்டுமே ஒத்துப்போனதால இரிடியம்னு அவர் பேரு வெச்சிட்டார்.

பிப்.: ம், சுவாரசியம்தான்.

பியூ.: இரிடியம் பல்வேறு ஆச்சரியங்களையும் சுவாரசியங்களையும் கொண்டது. ‘அனைத்துலக எடை, அளவீடுகளுக்கான அமைப்பு’ கிலோ கிராம் எடையைத் தீர்மானிப்பதற்கு 90 சதவீத பிளாட்டினம், 10 சதவீத இரிடியத்தைக் கலந்து பொ.ஆ. 1889-ல ஒரு எடைக்கல்லைத் தயாரிச்சு பாரிஸ்ல வெச்சது. அதுதான் கிலோகிராமுக்கான தரப்படுத்தப்பட்ட எடையா போன வருசம் வரைக்கும் இருந்துச்சு.

பிப்.: இரிடியத்தைப் பயன்படுத்த ஏதாவது சிறப்புக் காரணம் இருக்கா?

பியூ.: அது துருவே பிடிக்காது. 2000 டிகிரி செல்சியஸ்ல வெப்பப்படுத்தினாலும் இந்தத் தன்மையை இரிடியம் இழக்கிறதில்லை.

பிப்.: ஓ! இந்த ரெண்டும் ரொம்ப முக்கியமாச்சே.

பியூ.: இரு, இரு. அதோட உருகுநிலையும் அதிகம், உறுதித்தன்மையும் அதிகம். விமான ஸ்பார்க் பிளக் தயாரிப்புல இரிடியம் பயன்படுது.

பிப்.: அது என்ன ஸ்பார்க் பிளக்?

பியூ.: இருசக்கர வண்டி இன்ஜின் உருவாக்குற ஆற்றல் மின்சாரமா மாறி, வண்டியை இயக்க வைக்க உதவுற தொடர்புக் கண்ணிதான் ஸ்பார்க் பிளக்.

பிப்.: ம், இப்பப் புரியுது.

பியூ.: ஸ்பார்க் பிளக் மட்டுமில்ல, நீண்ட காலம் பயன்படுத்தக்கூடிய விமான இன்ஜின் பாகங்கள் இரிடியம் கலப்பு உலோகத்தாலதான் தயாரிக்கப்படுது.

பிப்.: இந்தப் பறக்கும் உலோகத்தோட பெருமைகள் முடிஞ்சிடுச்சா, இன்னும் இருக்கா?

பியூ.: இருக்கே. வாயேஜர், வைகிங், பயனீர், காசினி, கலிலியோ, நியூ ஹாரிசான்ஸ் போன்ற அமெரிக்காவின் ஆளற்ற விண்கலன்கள்ல பயன்படுத்தப்பட்ட ரோடியோஐசோடோப்பு தெர்மோஎலெக்டிரிக் ஜெனரேட்டர்கள்லயும் இரிடியம் பயன்பட்டிருக்கு.

பிப்.: ஆமா, இத்தனை பறக்குற விஷயங்கள்ல பயன்படுதே, ரொம்ப விலை அதிகமான தனிமமோ?

பியூ.: அப்புறம், பிளாட்டினம் குழுவைச் சேர்ந்ததாச்சே.

பிப்.: பிளாட்டினம் விண்கல்லுல இருந்து பூமிக்கு வந்ததா, எங்கோ படிச்ச ஞாபகம் இருக்கு.

பியூ.: நல்லாதான் ஞாபகம் வச்சிருக்க. இரிடியமும் அப்படி பூமிக்கு வந்ததுதான். 6 கோடி வருசத்துக்கு முன்னால டைனோசர் எல்லாம் பூண்டோடு அழிஞ்சு போனதுக்குப் புவி மேல மாபெரும் விண்கல் மோதினதுதான் காரணம்னு சொல்றாங்கல்ல...

பிப்.: ஆமா.

பியூ.: பூமியின் மேலோட்டுல உள்ள ஒரு வகை களிமண் அடுக்குல, மற்ற அடுக்குகளைவிட அதிகமாக இரிடியம் இருக்கு. அதுக்குக் காரணம் விண்கல் மோதல்தான். டைனோசர் அழிவுக்கும் இந்த விண்கல் மோதலுக்கும் இரிடியம்தான் முடிச்சுப் போட்டுச்சு.

பிப்.: விண்கல், விண்கலம், விமானம்னு பறக்குற விஷயங்களுக்கும் இரிடியத்துக்கும் ஏதோ நெருக்கமான தொடர்பு இருக்கு, பியூ.

பியூ.: நீ சொல்றதும் சரிதான் பிப்.

கட்டுரையாளர் தொடர்புக்கு: valliappan.k@thehindutamil.co.in