அன்றாட வாழ்வில் வேதியியல் 18: பலசாலி போரான்

பிப்பெட்: வணக்கம் பியூ. சிலிக்கான், எர்பியம்னு கணினி, இணையம் தொடர்பாவே ரெண்டு வாரமா பேசிட்டு இருக்கோம்.

பியூரெட்: ஆமா, நவீன அறிவியல்-தொழில்நுட்ப வளர்ச்சியில வேதியியலின் பங்கை இதன் மூலமா தெரிஞ்சுக்க முடியுது, இல்லையா?

பிப்.: ஆமா, அப்ப இந்த வாரம் என்ன தனிமத்தைப் பத்திப் பார்க்கப் போறோம்?

பியூ.: போரான்.

பிப்.: போரானுக்கும் கணினிக்கும் ஏதாவது தொடர்பு இருக்கா?

பியூ.: இல்ல. ஆனா, போரானுக்கும் சிலிக்கானுக்கும் தொடர்பு இருக்கு.

பிப்.: அது என்ன?

பியூ.: உலோகப்போலிகளில் இரண்டாவது அதிக உருகுநிலை, கொதிநிலையைக் கொண்டது சிலிக்கான்.

பிப்.: அதைத்தான் ஏற்கெனவே நீ சொல்லிட்டியே.

பியூ.: உலோகப்போலிகளில் அதிக உருகுநிலை, கொதிநிலையைக் கொண்டது போரான். அப்புறம் அது இல்லேன்னா, துணிகளும் தாவரங்களும் ரொம்பக் கஷ்டப்படும்.

பிப்.: ஏன்?

பியூ.: ஏன்னா சலவைத் தூள், சோப்புகளில் போரான் சேர்க்கப்படுது.

பிப்.: ஓஹோ, அப்ப தாவரங்கள்?

பியூ.: தாவர வளர்ச்சிக்குத் தேவையான அவசிய ஊட்டச்சத்து இது. தாவரங்களின் செல் சுவரை போரான் வலுப்படுத்துது. அதனால போரானை அடிப்படையா கொண்ட போராக்ஸும் போரிக் அமிலமும் உரங்களில் சேர்க்கப்படுகின்றன.

பிப்.: ஓ! போரான் பயிரை வளர்க்குதா.

பியூ.: அது மட்டுமில்ல, கணுக்காலிகளிடம் நச்சாகச் செயல்படுவதால், பயிர்களுக்கான பூச்சிக்கொல்லிகளிலும் போரான் சேர்க்கப்படுது.

பிப்.: ஒரு பக்கம் ஊட்டச்சத்து, இன்னொரு பக்கம் பூச்சிக்கொல்லி. அருமை.

பியூ.: அதேநேரம் போரானோட அளவு கூடிடக் கூடாது. அப்படி நடந்தா இலை நுனிகள் கருகி, தாவர வளர்ச்சி குறைஞ்சுகூட போயிடும்.

பிப்.: ம், எப்பவும் எதுவும் அளவோட இருக்கணும், அப்படித்தானே?

பியூ.: மனுசங்களுக்கும் போரான் உதவி பண்ணுது.

பிப்.: அதைப் பத்தி இன்னும் கொஞ்சம் சொல்லேன்.

பியூ.: ஆன்டிசெப்டிக், பூஞ்சைத் தடுப்பு, வைரஸ் தடுப்பு குணங்களை போரிக் அமிலம் கொண்டிருக்கு. அதனால, நீச்சல் குளங்கள்ல தண்ணீரைத் தூய்மைப்படுத்த இதைப் பயன்படுத்துறாங்க. இயற்கையாகவே நுண்ணுயிர் எதிர்ப்பு ஆற்றல் கொண்ட போரான் மருந்துகளும் உள்ளன.

பிப்.: போரானுக்கு மதிப்பு கூடிக்கிட்டே போகுது.

பியூ.: இன்னும் முடியல பிப். உலகத்துல உற்பத்தியாகும் போரானில் பாதிக்கு மேல் கண்ணாடி இழை (ஃபைபர் கிளாஸ்) உருவாக்கப் பயன்படுது. கட்டுமானப் பொருள் தயாரிப்பிலும் மின்கடத்தலைத் தடுக்குறதுக்கும் இந்தக் கண்ணாடி இழை பயன்படுது.

பிப்.: கண்ணாடியும் கண்ணாடி இழையும் வேற வேற தானே?

பியூ.: ஆமா, கண்ணாடி இழை தயாரிப்பிலும் போரான் பயன்படுது. கண்ணாடி தயாரிப்பிலும் பயன்படுது. சாதாரண கண்ணாடியைவிட போரோசிலிகேட் கண்ணாடி ரொம்ப வலுவானதாவும், வெப்ப-அதிர்ச்சி தாங்கியாவும் மேம்பட்டு இருக்கு.

பிப்.: பயங்கர பலசாலியா இருக்கும் போலிருக்கே.

பியூ.: பலசாலி மட்டுமில்ல, பளபளப்பும் தரும்.

பிப்.: அப்படி எதுக்கெல்லாம் தருது?

பியூ.: பைரெக்ஸ் கண்ணாடி, பீங்கானைப் பளபளப்பாக்க போரானைத்தான் பயன்படுத்துறாங்க. வெப்பத்தால் பாதிக்கப்படாத டைல்ஸ், சமையலறைப் பொருட்களை உருவாக்க இவை பயன்படுகின்றன.

பிப்.: மொத்தத்துல போரான் பயன்கள் சொல்லித் தீராது.

தொடர்புக்கு: valliappan@thehindutamil.co.in