தேர்வுக்குத் தயாரா? - தேவையில்லை தேர்வு பயம்

தேர்வுக் காலத்தில் பள்ளி மாணவர்களின் உடல் நலத்தில் கவனம் செலுத்துவதற்கு இணையாக மனநலத்துக்கும் கவனம் அளிப்பது அவசியம்.

தேர்வு நோக்கிலான மன அழுத்தம் என்பது ஒரு வகையில் ஆக்கப்பூர்வமாக உதவும். ஏனெனில் பாடத்தில் கவனத்தைக் குவிக்கவும், மூளையின் ஆற்றலைத் திரட்டவும் அது கைகொடுக்கும். ஆனால், அளவுக்கு அதிகமான மன அழுத்தம் தேர்வு குறித்த அச்சத்தை அதிகமாக்கி, தேர்வுக்குத் தயாராகும் செயல்களையும் தேர்வெழுதும் திறனையும் பாதிக்கக்கூடும். இந்த மிகையான தேர்வு அச்சம் மாணவர்களைச் சூழாது இருக்க அவர்களின் குடும்பத்தினர் உதவுவது அவசியம்.

எதிர்மறை தவிர்க்க

அதிக மதிப்பெண்களுக்காக மாணவரை உந்தும் வழக்கமான அழுத்தங்களைத் தேர்வுக் காலத்தில் தவிர்ப்பது நல்லது. கடைசி நேரத்தில் விழுந்து விழுந்து படித்து ஆகப்போவது ஏதுமில்லை. அதனால், அதுவரை படித்ததைத் திருப்பிப் பார்க்கத் தோதான சூழலை வழங்குவதே போதுமானது.

சோர்வடையும் நேரத்தில் பாடம் சார்ந்த தனித் திறமைகள், முந்தைய வெற்றிகள் என உத்வேகமூட்டும் சிலவற்றை நினைவூட்டுவதும் உதவும். எதிர்மறையாகப் பேசுவோர், மட்டம் தட்டுவோரை மாணவர் அருகில் அனுமதிக்க வேண்டாம். ‘வினாத்தாள் வெளியானது… கடினமான வினாக்கள் அதிகம் கேட்பார்கள்… தேர்வு நாளன்று விடுமுறை அறிவிக்க வாய்ப்புள்ளது...’ என்பது போன்ற சக மாணவர்கள் கிளப்பும் புரளிகளுக்குக் காதுகொடுக்க வேண்டாம். 

பதற்றம் தணிக்க…

மாதிரித் தேர்வுகளை அதிகம் எழுதிப் பழகுவது, மதிப்பெண்கள் உயர்வுக்கு மட்டுமன்றித் தேர்வு தொடர்பான அச்சம் அகலவும் உதவும். மாதிரித் தேர்வின்போதும், படித்ததை எழுதிப்பார்க்கும் வேளைகளிலும் தேர்வறையைக் கற்பனை செய்துகொண்டு எழுதிப் பழகுவதும் நல்லது. இரவோ பகலோ எப்போது முழுமனதோடு படிக்க முடிகிறதோ அப்போதெல்லாம் தாராளமாகப் படிக்கலாம்.