சினிமா துளிகள் (23/03/2019)

* ‘தேவா’ படத்தில் விஜய்யுடனும், ‘வான்மதி’ படத்தில் அஜித்துடன் நடித்த ஸ்வாதி, நீண்ட வருடங்களுக்குப் பிறகு சினிமாவில் நடிக்க ஆர்வம் காட்டுகிறார். தற்போது தெலுங்கில் ஒரு தொலைக்காட்சி நிகழ்ச்சியைத் தொகுத்து வழங்குகிறார்.

* விவேக் பிரதான கதாபாத்திரத்தில் நடிக்கும் படத்துக்கு ‘வெள்ளைப் பூக்கள்’ எனத் தலைப்பு வைக்கப்பட்டுள்ளது. இவருடன் இணைந்து சார்லி, பூஜா தேவரியா, தேவ், பெய்ஜ் ஹெண்டர்சன் ஆகியோர் நடிக்கின்றனர். விவேக் இளங்கோவன் இந்தப் படத்தின் இயக்குநர்.

* ஃபிலிம் நியூஸ் ஆனந்தனைப் பற்றி முக்கியப் பிரமுகர்கள் எழுதியுள்ள ‘ஞாபகம் வருதே’ நூலை, நடிகர் சிவகுமார் வெளியிட்டார். அருள்செல்வன் இந்த நூலைத் தொகுத்துள்ளார்.

* இரட்டை இயக்குநர்களான கார்த்திக் - விக்னேஷ், தமிழ் மற்றும் தெலுங்கில் உருவாகும் படத்தை இயக்குகின்றனர். இன்னும் தலைப்பு வைக்கப்படாத இந்தப் படத்தில், நடிகர் சாய்குமாரின் மகன் ஆதி சாய்குமார் ஹீரோவாக நடிக்கிறார். அவர் ஜோடியாக வேதிகா நடிக்கிறார்.

* சிபி சத்யராஜை வைத்து ‘ஜாக்சன் துரை’ படத்தை இயக்கிய தரணிதரன், மறுபடியும் சிபியை வைத்து ஒரு படத்தை இயக்குகிறார். காட்டு இலாகா அதிகாரியாக சிபி நடிக்கும் இந்தப் படத்தில், முக்கியக் கதாபாத்திரத்தில் ஒரு புலி நடிக்கிறது.

* ‘தில்லுக்கு துட்டு 2’ படத்தை இயக்கிய ராம்பாலா, அடுத்தாக ‘டாவு’ என்ற படத்தை இயக்கியுள்ளார். சந்திரன், ரெபா மோனிகா ஜான் நடித்துள்ள இந்தப் படத்தில், க்ளைமாக்ஸ் தவிர மொத்தப் படப்பிடிப்பும் முடிவடைந்துவிட்டது.

* திலீப் நடிக்கும் ‘ஜாக் டேனியல்’ என்ற மலையாளப் படத்தில், முக்கியக் கதாபாத்திரத்தில் அர்ஜுன் நடிக்கிறார். ஹீரோயினாக அஞ்சு குரியன் நடிக்கும் இந்தப் படத்தை, ஷிபு தமீம்ஸ் தயாரிக்கிறார். இதன் படப்பிடிப்பு கடந்த 21-ம் தேதி தொடங்கியது.

* பாபா பாஸ்கர் இயக்கத்தில் ஜீ.வி.பிரகாஷ் நடித்துள்ள ‘குப்பத்து ராஜா’ படத்துக்கு ‘யு/ஏ’ சான்றிதழ் கிடைத்துள்ளது. பார்த்திபன் முக்கியக் கதாபாத்திரத்தில் நடித்துள்ள இந்தப் படத்தில், பாலக் லல்வானி மற்றும் பூனம் பாஜ்வா இருவரும் ஹீரோயின்களாக நடித்துள்ளனர்.

* ஓவியா நடிப்பில் ‘காஞ்சனா 3’ மற்றும் ‘கணேசா மீண்டும் சந்திப்போம்’ என இரண்டு படங்கள் ஏப்ரல் மாதம் ரிலீஸாகின்றன. மேலும், ‘களவாணி 2’ மற்றும் ஆரவ்வுடன் ஓவியா ஆடியுள்ள ‘ராஜபீமா’ படங்களும் அடுத்தடுத்து ரிலீஸுக்குத் தயாராகி வருகின்றன.