காலாண்டு முடிவுகள்

ஐசிஐசிஐ வங்கி நிகரலாபம் 12% உயர்வு

தனியார் வங்கியான ஐசிஐசிஐ வங்கியின் ஜூன் காலாண்டு நிகர லாபம் 12% உயர்ந்து 2,976 கோடி ரூபாயாக இருக்கிறது. கடந்த வருடம் இதே காலாண்டில் லாபம் 2,655 கோடி ரூபாயாக இருந்தது.

வங்கியின் மொத்த வருமானம் சிறிதளவு உயர்ந்திருக்கிறது. கடந்த வருடம் இதே காலாண்டில் 14,616 கோடி ரூபாயாக இருந்த மொத்த வருமானம் இப்போது 15,802 கோடி ரூபாயாக உயர்ந்திருக்கிறது.

வாராக்கடனுக்கு ஒதுக்கீடு செய்த தொகை சிறிது உயர்ந்திருக்கிறது. கடந்த வருடம் இதே காலாண்டில் 726 கோடி ரூபாய் ஒதுக்கப்பட்டது. இப்போது அந்த தொகை 956 கோடி ரூபாயாக அதிகரிக்கப்பட்டிருக்கிறது.

கடந்த வருடம் ஜூன் காலாண்டுடன் ஒப்பிடும் போது மொத்த வாராக்கடன் உயர்ந்திருக்கிறது. கடந்த ஜூன் மாதம் 3.05 சதவீதமாக இருந்த வாராக்கடன் இப்போது 3.68 சதவீதமாக இருக்கிறது. இருந்தாலும் கடந்த மார்ச் காலாண்டுடன் ஒப்பிடும் போது குறைவாகும். வர்த்தகத்தின் முடிவில் 3.92 சதவீத அளவுக்கு பங்கு உயர்ந்தது.

கேவிபி நிகரலாபம் ரூ.134 கோடி

கரூர் வைஸ்யா வங்கியின் ஜூன் காலாண்டு நிகரலாபம் 10 சதவீதம் உயர்ந்து 134 கோடி ரூபாயாக இருக்கிறது. கடந்த வருடம் இதே காலாண்டில் 122 கோடி ரூபாயாக நிகரலாபம் இருந்தது.

மொத்த வருமானம் 3.8 சதவீதம் உயர்ந்தது. கடந்த ஜூன் காலாண்டில் 1,462 கோடி ரூபாயாக இருந்த மொத்த வருமானம் இப்போது 1,518 கோடி ரூபாயாக இருக்கிறது. ஆனால் வங்கியின் மொத்த வாராக்கடன் உயர்ந்திருக்கிறது. கடந்த வருடம் ஜூன் காலாண்டில் 1.3 சதவீதமாக இருந்த மொத்த வாராக்கடன் இப்போது 1.91 சதவீதமாக இருக்கிறது.

அதேபோல நிகர வாராக்கடனும் 0.53 சதவீதத்தில் இருந்து 0.88 சதவீதமாக உயர்ந்திருக்கிறது. வாராக்கடன் உயர்ந்திருப்பதால் அதற்காக ஒதுக்கீடு செய்த தொகையும் உயர்ந்திருக்கிறது. கடந்த ஜூன் காலாண்டில் 86 கோடி ரூபாயாக இருந்த ஒதுக்கீடு இப்போது 117 கோடி ரூபாயாக இருக்கிறது. வர்த்தகத்தின் முடிவில் 0.07 சதவீதம் அளவுக்கு இந்த பங்கு சரிந்து முடிந்தது.

எல் அண்ட் டி நிகரலாபம் 37% சரிவு

இன்ஜினீயரிங் மற்றும் கட்டுமான நிறுவனமான எல் அண்ட் டி நிறுவனத்தின் ஜூன் காலாண்டு நிகரலாபம் 37 சதவீதம் சரிந்து 606 கோடி ரூபாயாக இருக்கிறது. கடந்த வருடம் இதே காலாண்டில் 966 கோடி ரூபாயாக நிகரலாபம் இருந்தது.

ஆனால் நிகர விற்பனை 6.7 சதவீதம் உயர்ந்தது. கடந்த வருடம் இதேகாலாண்டில் 18,974 கோடி ரூபாயாக இருந்த விற்பனை இப்போது 20,252 கோடி ரூபாயாக இருக்கிறது. நிறுவனத்தின் மொத்த விற்பனை வெளிநாட்டு விற்பனை 32 சதவீதமாக இருக்கிறது.

இந்த காலாண்டில் 26,376 கோடி ரூபாய்க்கு புதிய ஆர்டர்கள் கிடைத்திருக்கின்றன. இதில் வெளிநாட்டு ஆர்டர்கள் 8,110 கோடி ரூபாய்க்கு உள்ளன. இதுவரை 2,38,976 கோடி ரூபாய் அளவுக்கு ஆர்டர்கள் உள்ளன. எல் அண்ட் டி இன்போடெக் நிறுவனத்தின் ஐபிஒ வெளியிட இயக்குநர் குழு ஒப்புதல் வழங்கியுள்ளது. வர்த்தகத்தின் முடிவில் 0.99 சதவீதம் இந்த பங்கு உயர்ந்து முடிந்தது.