உலக மசாலா: அட, சுவாரசியமான சாகசப் பயணம்தான்!

‘அப்’ என்ற அனிமேஷன் திரைப்படத்தைப்போல், 8 ஆயிரம் அடி உயரத்தில் வண்ண பலூன்களில் பறந்து திரும்பியிருக்கிறார் டாம் மோர்கன். இங்கிலாந்தைச் சேர்ந்த சாகசப் பயணங்களை ஏற்படுத்திக் கொடுக்கும் நிறுவனம் ‘தி அட்வஞ்சரிஸ்ட்’. இமய மலையில் ரிக்ஷா ஓட்டுதல், ரஷ்யாவின் பனி உறைந்த ஏரியில் மோட்டார் பைக்கில் பயணம் செய்தல் போன்ற சாகசப் பயணங்களை ஏற்கெனவே வெற்றிகரமாக செய்திருக்கிறது. சாகசப் பயணங்களின் மூலம் கிடைக்கும் நிதி, பல்வேறு அறக்கட்டளைகளுக்கு பிரித்துக் கொடுக்கப்படுகிறது. கடந்த 12 ஆண்டுகளாக இதுபோன்ற சாகசப் பயணங்கள் மூலம் 42 கோடியே 59 லட்சம் ரூபாயைத் திரட்டி, நன்கொடையாக அளித்திருக்கிறோம் என்கிறார் நிறுவனர் டாம் மோர்கன். “திரைப்படத்தில் பார்த்ததுபோல் 100 பலூன்களை கட்டிக்கொண்டு பறக்கும் சாகசப் பயணம் ஒன்றை ஏற்பாடு செய்ய முடிவெடுத்தோம். இரண்டு மாதங்கள் திட்டமிட்டோம். இந்தப் பயணத்துக்கான சோதனை ஓட்டத்தில் நானே கலந்துகொள்ள முடிவு செய்தேன். பலூனில் பறக்கும்போது பருவநிலை சீராக இருக்க வேண்டும். இல்லை என்றால் பலூன்கள் உடைந்து, பயணமே ஆபத்தில் முடிந்துவிடலாம். அதனால் தென் ஆப்பிரிக்காவுக்குச் சென்றோம். இரண்டு நாட்கள் பலூன்களில் ஹீலியம் வாயுவை நிரப்பினோம். முதல் ஒன்றிரண்டு முயற்சிகள் தோல்வியடைந்தன. பிறகு வெற்றிகரமாக பயணத்தை தொடங்கினேன். பயமும் மகிழ்ச்சியும் கலந்த அற்புதமான அனுபவம். 8 ஆயிரம் அடி உயரத்தில் 25 கி.மீ. தூரத்துக்குப் பறந்து வெற்றிகரமாகத் திரும்பிவிட்டேன். பலூன்களுக்குக் கீழ் இருந்த நாற்காலியில் பாதுகாப்பு கருவிகளையும் தொலைத் தொடர்பு கருவிகளையும் இணைத்திருக்கிறோம். இதைப் பார்ப்பவர்கள் நம்பிக்கையோடு சாகசப் பயணத்தில் பங்கேற்பார்கள்” என்கிறார் டாம் மோர்கன்.

அட, சுவாரசியமான சாகசப் பயணம்தான்!

ரஷ்யாவில் இன்ஸ்டாகிராமில் ஒளிப்படங்களை வெளியிடுவதில் மக்கள் அதிகமாக ஆர்வம் காட்டி வருகிறார்கள். இவர்களுக்காகவே ஜியான்லுகா வசியும் டான் பில்ஸெரியனும் சேர்ந்து ஜெட் விமானத்தை வாடகைக்குக் கொடுக்கின்றனர். ஆடம்பரமான இந்த விமானத்தில் சில மணி நேரங்களுக்கு கட்டணம் செலுத்திவிட்டு, விதவிதமாக ஒளிப்படங்கள் எடுத்து இன்ஸ்டாகிராமில் வெளியிடலாம். “எல்லோராலும் தனி விமானத்தில் பயணம் செய்ய இயலாது. ஆனால் ஆசை இருக்கும். அவர்களின் ஆசையைப் பூர்த்தி செய்யும் விதத்தில் விமானத்தை வாடகைக்கு விடுகிறோம். 2 மணி நேரத்துக்கு 16 ஆயிரம் ரூபாய் கட்டணம் என்பது சாதாரணமானதுதான். நாங்களே தொழில்முறை ஒளிப்படக்காரரையும் ஒப்பனை செய்பவரையும் ஏற்பாடு செய்கிறோம். அவற்றுக்கு தனிக் கட்டணம். விலை உயர்ந்த ஷாம்பெயின் பாட்டிலும் சுவையான உணவும் மேஜையில் இருக்கும். இவற்றைச் சாப்பிடுவதுபோல் படம் எடுத்துக்கொள்ளலாம். இங்கே வருபவர்கள் எங்களின் சேவையில் மனம் மகிழ்ந்து, பணத்தை தாராளமாகக் கொடுத்துவிட்டுச் செல்கிறார்கள். இன்ஸ்டாகிராம் மீது ஆர்வம் இருப்பவர்களுக்குத்தான் எங்கள் சேவையின் மகத்துவம் புரியும்” என்கிறார்கள் இந்த ரஷ்யர்கள்.

ஒளிப்படம் மோகம் இருக்கும்வரை தொழில்கள் பெருகும்!