Published : 27 Oct 2015 10:31 AM
Last Updated : 27 Oct 2015 10:31 AM
பிரிட்டனில் சாம்பல் வண்ண அணில்கள்தான் வசித்து வந்தன. ஆனால் சமீபக் காலமாக வெள்ளை அணில்கள் தென்படுகின்றன. கண்களைத் தவிர உடல் முழுவதும் வெள்ளையாக மாறி இருக்கின்றன. ‘‘நிறக் குறைபாடும் மரபணு மாற்றமும் விலங்குகளையும் பறவைகளையும் வெள்ளையாக மாற்றிவிடுகின்றன.
பிரிட்டனில் 50 லட்சம் சாம்பல் அணில்கள் வசித்து வந்தன. இன்று கணிசமான அளவில் வெள்ளை அணில்களைப் பார்க்க முடிகிறது. வெள்ளைக் காகம், வெள்ளை மயில், வெள்ளை பாம்பு போன்றவை எல்லாம் இப்படித்தான் உருவாகி வருகின்றன’’ என்கிறார் வன ஆர்வலர் ஆண்ட்ரு ஃபுல்டன்.
ம்… இன்னும் என்னென்ன மாற்றங்கள் எல்லாம் நிகழக் காத்திருக்கின்றனவோ…
நீண்ட காலம் வாழக்கூடியவை ஆமைகள். வெட் கிம் வளர்த்து வந்த கடல் ஆமை ஹாரிக்கு பின்னங்கால்களில் ஒன்று உடைந்துவிட்டது. 11 வயது ஹாரிக்கு பின்னங்கால் இல்லாமல் நகர்ந்து செல்வதோ, நீந்துவதோ மிகவும் கடினமாக இருந்தது. ‘‘குறைந்தது இன்னும் 50 ஆண்டுகளாவது வாழக்கூடியது ஹாரி. ஒரு கால் இழந்ததால் ஹாரியின் வாழ்நாள் குறைந்துவிடுமோ என்று அஞ்சினேன். என் காலத்துக்குப் பிறகும் ஹாரிதான் உலகில் வசிக்கும்.
அதனால் உலோகத்தால் ஆன சக்கரங்களை ஹாரியின் உடலில் பொருத்தும் யோசனையை கால்நடை மருத்துவமனையில் தெரிவித்தேன். அவர்களும் இதற்குச் சம்மதித்தனர். இதோ உலோக சக்கரங்கள் நன்றாக ஹாரியின் உடலில் ஒட்டிக்கொண்டன. ஹாரி சக்கரங்களைப் பயன்படுத்தி, நகர்ந்து செல்ல கற்றுக்கொண்டுவிட்டது. இனி ஹாரியைப் பற்றிக் கவலை இல்லை’’ என்கிறார் வெட் கிம்.
ஆமைக்குக் கால் கொடுத்த வள்ளல் வாழ்க!
ஜேசன் ஆக்ஸ்லீ இங்கிலாந்தில் வசிக்கிறார். விளையாட்டுப் பயிற்சியாளராக இருக்கும் ஜேசனுக்கு ஷூக்களைச் சேகரிப்பது மிகவும் பிடித்தமான பொழுதுபோக்கு. இதுவரை 150 ஜோடி ஷூக்களைச் சேகரித்து இருக்கிறார். 50 ஜோடி ஷூக்களை படுக்கைக்கு அடியில் வைத்திருக்கிறார். 80 ஜோடி ஷூக்களை பரணில் போட்டு வைத்திருக்கிறார். மீதி 20 ஜோடி ஷூக்களை வைப்பதற்கு இடமில்லை.
தன் இரு மகள்களிடமும் அவர்களது அறையில் வைத்துக்கொள்ளச் சொல்லிக் கேட்டும், அவர்கள் மறுத்துவிட்டனர். ஒவ்வொரு மாதமும் 10 ஆயிரம் ரூபாயை ஷூக்கள் வாங்குவதற்காகச் செலவிடுகிறார் ஜேசன். ‘‘நானும் ஜேசனின் சேகரிப்புகளைக் கண்டு ஆச்சரியப்படுகிறேன். அவரது பொழுது போக்கை மதிக்கிறேன். ஆனால் வீட்டில் குடியிருப்பவர்களின் தேவைகளைக் குறைத்துக்கொண்டு, ஷூக்களுக்கு இடம் அளிக்க முடியாது. இனிமேலும் ஷூக்கள் சேகரிப்பதை ஜேசன் நிறுத்தவில்லை என்றால், நான் கிளம்பிவிடுவேன்’’ என்கிறார் அவரது மனைவி.
‘‘ஷூக்களை வாங்கி, கண் தெரியாத இடத்தில் வைப்பதில் எனக்கு விருப்பம் இல்லை. அதற்காக ஷுக்கள் வாங்குவதையும் விடப் போவதில்லை. பெரிய இடம் கிடைத்தால் பிரச்சினை தீரும்’’ என்கிறார் ஜேசன்.
ஷூக்களை, இல்லாதவர்களுக்குக் கொடுக்கலாமே ஜேசன்…
லண்டனைச் சேர்ந்த மார்ஷ்மெல்லோ லேசர் ஃபீஸ்ட் என்ற டிசைன் ஸ்டூடியோ இயற்கையையும் தொழில்நுட்பத்தையும் இணைத்து வித்தியாசமான அனுபவத்தை வழங்கியிருக்கிறது. மரங்கள் அடர்ந்த இடத்துக்கு அழைத்துச் சென்று, லிடார் என்ற கருவியைத் தலையில் மாட்டுகிறார்கள். சிறிது நேரத்தில் பல வண்ண லேசர் ஒளி மூலம் பூச்சிகளும் விலங்குகளும் கண்களுக்குப் புலப்பட ஆரம்பிக்கின்றன.
காட்சிக்கு ஏற்றவாறு இசையும் ஒலிக்கிறது. பூச்சிகள் மட்டுமில்லை, விலங்குகளும் பறந்து செல்கின்றன. காண்பவர்களுக்கு மிக அற்புதமான அனுபவத்தைத் தருகிறது. நிறுவனத்தின் இயக்குனர் பார்னே ஸ்டீல், ‘‘இதுவரை எங்கள் லிடார் கருவியை அணிந்தவர்கள் பிரமாதமான வரவேற்பைக் கொடுத்திருக்கிறார்கள். காட்சி உண்மை அல்ல, மெய்நிகர் (வர்ச்சுவல் ரியாலிட்டி) காட்சிதான். ஆனால் உண்மையான விலங்குகளையோ, பூச்சிகளையோ நீங்கள் பார்ப்பது போல காட்சிகளாலும் ஒலியாலும் உணரவைத்து விடுகிறது’’ என்கிறார்.
எதிர்காலத்தில் விலங்குகளையும் பூச்சிகளையும் லிடார் மூலம்தான் பார்க்க முடியும் போலிருக்கு…
Sign up to receive our newsletter in your inbox every day!
WRITE A COMMENT