புதிய வரலாறு: பெல்ஜியம்-பனாமா கால்பந்து போட்டியில் பங்கேற்ற தமிழக, பெங்களூரு குழந்தைகள்

ரஷியாவில் நடந்து வரும் உலகக்கோப்பை கால்பந்துப் போட்டியில், பெல்ஜியம், பனாமா அணிகளுக்கு இடையிலான போட்டியில் இந்தியக் குழந்தைகள் இருவர் பங்கேற்று பந்தை வழங்கியுள்ளனர்.

இதில் 10வயதான பெங்களூரைச் சேர்ந்த ரிஷி தேஜ் என்ற சிறுவனும், 11-வயதான தமிழகத்தைச் சேர்ந்த நாதானியா ஜான் கன்டதில் என்ற சிறுமியும் சிறப்பு அழைப்பாளர்களாகப் பங்கேற்றனர்.

பிபா ஓம்பிசி திட்டத்தின் கீழ் 64 நாடுகளைச் சேர்ந்த குழந்தைகள் தேர்வு செய்யப்பட்டு அவர்கள் அழைக்கப்பட்டனர். அவர்கள் போட்டி தொடங்கும் முன் இரு அணி வீரர்களின் முன் அணிவகுத்து வந்து, அவர்களுக்கு பந்தை அளிப்பார்கள். அந்த வகையில் இந்த உலகக்கோப்பைப் போட்டியில்பங்கேற்க பெங்களூரு, தமிழகத்தைச் சேர்ந்த இரு குழந்தைகள் தேர்வு செய்யப்பட்டு இருந்தனர்.

இது குறித்து 10 வயதான ரிஷி கூறுகையில், நான் உலகக்கோப்பைப் போட்டிக்கு தேர்வு செய்யப்பட்டு இருக்கிறேன் என்ற செய்தி அறிந்ததும் கடந்த 10 நாட்களாக மகிழ்ச்சியில் தூக்கம் வரவில்லை. அதை அளவிட முடியாது. ரஷியாவில் ஒவ்வொரு வினாடியையும் நான் ரசித்து இருந்தேன். போட்டி நடக்கும் போது, நான் அதைப் பார்த்து மகிழ்ந்ததோடு மட்டுமல்லாமல், எப்படி விளையாடுகிறார்கள் என்றும் பார்த்தேன் எனத் தெரிவித்தார்.

தமிழகத்தைச் சேர்ந்த நாதானியா 50 சிறுவர்களுடன் போட்டியிட்டு அதில் வெற்றி பெற்று ரஷியா சென்றுள்ளார். நாதானியாவின் கால்பந்து ஆர்வம், அவரின் திறமைகளைப் பார்த்து ஒவ்வொருவரும் வியந்து அவரைத் தேர்வு செய்துள்ளனர்.

நாளை மறுநாள் பிரேசில், கோஸ்டாரிகா அணிகளுக்கு இடையிலான போட்டியில் கையில் பந்தை ஏந்தி வீரர்களுடன் நடந்து செல்லும் நாதானியா போட்டி தொடங்கும் வரை இருப்பார்.

இது குறித்து நாதானியா கூறுகையில், ஏறக்குறைய 1500 சிறுவர், சிறுமிகள் ரஷியாவுக்கு செல்லும் போட்டியில் பங்கேற்றனர். அதில் 50 குழந்தைகளில் ஒருவராக நான் தேர்வானேன். நான் ரஷியாவில் உலகக்கோப்பைப் போட்டியை பார்க்கப்போகிறேன் என்ற செய்தி அறிந்ததும் என் மகிழ்ச்சியை வெளிப்படுத்த முடியவில்லை. அதிலும் பிரேசில் அணியுடனான போட்டியில் பங்கேற்பதை நினைத்துக்கூடப் பார்க்கவில்லை. முடிந்தவரை வீரர்களிடம் ஆட்டோகிராப் வாங்க முயற்சிப்பேன் எனத் தெரிவித்தார்.