திரும்பினார் ஷேன் வார்ன்- ராஜஸ்தான் ராயல்ஸ் அணியின் ஆலோசகராக

2008 முதல் ஐபிஎல் தொடரில் ராஜஸ்தான் ராயல்ஸ் அணியின் கேப்டனாக அந்த அணியை சாம்பியன் பட்டத்துக்கு இட்டுச் சென்ற ஆஸ்திரேலிய ஸ்பின் லெஜண்ட் ஷேன் வார்ன் மீண்டும் ராஜஸ்தான் அணிக்கு ஆலோசகராக, அறிவுரையாளராகத் திரும்பியுள்ளார்.

ஐபிஎல் சாம்பியன் அணியாக ராஜஸ்தான் அணியை உயர்த்திய 10 ஆண்டுகளுக்குப் பிறகு மீண்டும் திரும்பியுள்ளார் ஷேன் வார்ன்.

இதனை ஷேன் வார்ன் “தாயகம் திரும்பினார்” என்று ராஜஸ்தான் ராயல்ஸ் கொண்டாடுகிறது.

“ராஜஸ்தான் ராயல்ஸ் அணிக்குத் திரும்பியது மிகவும் மகிழ்ச்சியளிக்கிறது, என் கிரிக்கெட் வாழ்க்கைப் பயணத்தில் ராஜஸ்தான் அணிக்க்கு எப்போதும் சிறப்பிடம் உண்டு. அணி உரிமையாளர்களும் ரசிகர்களும் காட்டிய அன்பை நினைக்கையில் எனக்கு புல்லரிக்கிறது.

இந்த முறை வலுவான, ஆற்றல் நிறைந்த இளம் வீரர்கள் அணியில் உள்ளனர். அவர்களுடன் பணியாற்றுவதை எதிர்நோக்குகிறேன்.

ராஜஸ்தான் ராயல்ஸ் அணிக்காக 2008-2011 ஐபிஎல் தொடர்களில் ஆடிய ஷேன் வார்ன் 52 போட்டிகளில் 56 விக்கெட்டுகளைக் கைப்பற்றினார்.

இந்த ஆண்டு ஐபிஎல் ஏலத்தில் பென் ஸ்டோக்ஸை ரூ.12.5 கோடிக்கும் இடது கை வேகப்பந்து வீச்சாளர் ஜெயதேவ் உனாட்கட்டை ரூ.11.5 கோடிக்கும் ராஜஸ்தான் ராயல்ஸ் அணி ஏலம் எடுத்தது குறிப்பிடத்தக்கது.