விசாகப்பட்டினத்தில் இன்று மோதல்: ஐதராபாத் அணியை சமாளிக்குமா புனே?

ஐபிஎல் தொடரில் இன்று இரவு 8 மணிக்கு விசாகப்பட்டினத்தில் நடைபெறும் ஆட்டத்தில் தோனி தலைமையிலான புனே ரைசிங் சூப்பர் ஜயண்ட்ஸ், டேவிட் வார்னர் தலைமையிலான சன் ரைசர்ஸ் ஐதராபாத் அணிகள் மோதுகின்றன.

புனே அணி 10 ஆட்டத்தில் 3 வெற்றி மட்டுமே பெற்று புள்ளிகள் பட்டியலில் 6-வது இடத்தில் உள்ளது. ஐதராபாத் அணி 6 வெற்றிகளுடன் பட்டியலில் 2-வது இடத்தை பிடித்துள்ளது.

பிளேப் ஆப் சுற்றுக்கு முன்னேறும் வாய்ப்பை தக்க வைத்துக்கொள்ள வேண்டுமென்றால் இன்றைய ஆட்டத்திலும் வரும் ஆட்டங்களிலும் கட்டாயமாக வெற்றி பெற வேண்டும் என்ற நெருக்கடிக்கு தள்ளப்பட்டுள்ளது புனே அணி.

கேப்டன் தோனிக்கு இந்த தொடர் கடினமானதாகவே அமைந் துள்ளது. சொந்த மைதானத்தில் கூட 4 தோல்விகளை சந்தித் துள்ளார். அணியில் புதிததாக சேர்க்கப்பட்டுள்ள உஸ்மான் கவாஜா, ஜார்ஜ் பெய்லி ஆகியோ ராலும் தொடர் வெற்றிகளை சாத்தியப்படுத்த முடியவில்லை.

பேட்டிங்கில் போராடி ரன் சேர்த்தாலும் பந்து வீச்சு படுமோசமாக உள்ளது. அஜிங்க்ய ரஹானே 417 ரன்கள் சேர்த்து அதிக ரன்கள் குவித்தவர்களின் பட்டியலில் 3-வது இடத்தில் உள்ளார். 10 ஆட்டங்களை முடித்துள்ள புனே அணியில் இதுவரை எந்த பந்து வீச்சாளரும் 15 விக்கெட்டுகளை வீழ்த்தியவர்களின் பட்டியலில் இடம்பெறவில்லை.

ஐதராபாத் அணி வலுவான பந்து வீச்சால் தொடர்ச்சியாக வெற்றிகளை வசப்படுத்தி வருகிறது. கடைசியாக நடப்பு சாம்பியன் மும்பை அணியை 85 ரன்கள் வித்தியாசத்தில் வீழ்த்தியிருந்தது.

வார்னரின் அதிரடி அணிக்கு பலம் சேர்க்கிறது. அவர் இந்த தொடரில் 5 அரை சதங்களுடன் 458 ரன்கள் குவித்துள்ளார். ஷிகர் தவணும் பொறுப்பை உணர்ந்து விளையாட தொடங்கி உள்ளது அணியின் வலிமையை அதிகரித்துள்ளது.

ஆல்ரவுண்டர் ஹென்ரிக்ஸூம் நம்பிக்கை அளிப்பவராக உள்ளார். காயத்தில் இருந்து மீண்டு அணிக்கு திரும்பி உள்ள யுவராஜ்சிங் கடந்த ஆட்டத்தில் 23 பந்தில் 39 ரன் விளாசினார். அவரிடம் இருந்து இன்றும் சிறப்பான ஆட்டம் வெளிப்படக்கூடும்.

ஐதராபாத் அணியின் வேகப்பந்து வீச்சு அதீத பலத்துடன் காணப்படுகிறது. ஆஷிஸ் நெஹ்ரா, புவனேஷ்வர் குமார், முஸ்டாபிஸூர் ரஹ்மான், பரிந்தர் ஷரண் ஆகியோர் அடங்கிய நால்வர் கூட்டணி இன்றைய ஆட்டத்தில் புனே வீரர்களுக்கு சவாலாக இருப்பார்கள்.

இரு அணிகளும் இந்த தொடரில் 2-வது முறையாக மோதுகின்றன. ஏப்ரல் 26-ல் நடைபெற்ற ஆட்டத்தில் புனே அணி 34 ரன்கள் வித்தியாசத்தில் வெற்றி பெற்றிருந்தது. இதற்கு இன்றைய ஆட்டத்தில் ஐதராபாத் அணி பதிலடி கொடுக்கும் முனைப்பில் உள்ளது.