யுஎஸ் ஓபன் சாம்பியன்: சானியா ஜோடிக்கு குவியும் வாழ்த்து

அமெரிக்க ஓபன் டென்னிஸ் மகளிர் இரட்டையரில் இந்தியாவின் சானிய மிர்சா - ஸ்விட்சர்லாந்தின் மார்டினா ஹிங்கிஸ் ஜோடி சாம்பியன் பட்டத்தைக் கைப்பற்றியது.

இந்த ஜோடிக்கு குடியரசுத் தலைவர் பிரணாப் முகர்ஜி, பிரதமர் நரேந்திர மோடி, காங்கிரஸ் துணைத் தலைவர் ராகுல் காந்தி உள்ளிட்டோர் வாழ்த்து தெரிவித்துள்ளனர்.

போட்டித் தரவரிசையில் முதலிடத்தில் இருந்த இந்த ஜோடி, 4-வது இடத்தில் இருந்த ஆஸ்திரேலியாவின் கேஸி டெல்லக்காவ், கஜகஸ்தானின் யரோஸ்லாவா ஜோடியை 6-3, 6-3 என்ற நேர் செட்களில் எளிதில் வீழ்த்தி பட்டம் வென்றது.

சானியா-ஹிங்கிஸ் ஜோடி இந்த தொடரில் ஒரு செட்டைக் கூட இழக்காமல் பட்டம் வென்றுள்ளது. கடந்த 2008-ம் ஆண்டு காரா பிளாக்- லிஸெல் ஹுபெர் ஜோடிக்குப் பிறகு இவ்வாறு ஒரு ஜோடி பட்டம் வெல்வது இதுவே முதல் முறை.

வெற்றி குறித்து சானியா கூறும்போது, "நடப்பாண்டு எங்களுக்கு மிகச்சிறப்பானதாக அமைந்தது. விம்பிள்டன், அமெரிக்க ஓபன் என அடுத்தடுத்து வென்றுள்ளோம்" என்றார். சானியா மகளிர் இரட்டையரில் வெல்லும் 2-வது கிராண்ட்ஸ்லாம் இதுவாகும்.

ஹிங்கிஸ் கலப்பு இரட்டையரில் இந்தியாவின் லியாண்டர் பயஸுடன் இணைந்து பட்டம் வென்றிருப்பது குறிப்பிடத்தக்கது. அவருக்கு இரட்டையரில் இது 11-வது கிராண்ட்ஸ்லாம் ஆகும்.

ஹிங்கிஸ் கூறும்போது, "தொடக்கத்தில் இருந்தே நாங்கள் அதிரடியாக ஆடினோம். இந்த ஆட்டமுறை எங்களுக்கு கைகொடுத்தது" என்றார்.

சானியாவும் ஹிங்கிஸும் இணைந்து விளையாடிய 12 தொடர்களில் 6 தொடர்களில் இறுதிப்போட்டிக்குள் நுழைந்திருப்பது குறிப்பிடத்தக்கது.

பிரணாப், மோடி வாழ்த்து

அமெரிக்க ஓபனில் பட்டம் வென்ற சானியா - ஹிங்கிஸ் ஜோடிக்கு குடியரசுத் தலைவர் பிரணாப் முகர்ஜி, பிரதமர் நரேந்திர மோடி உள்ளிட்டோர் வாழ்த்து தெரிவித்துள்ளனர்.

"அற்புதமான வெற்றிக்காக வாழ்த்துகள் சானியா, ஹிங்கிஸ். உங்களின் சாதனைகள் எங்களுக்கு பெருமிதம் அளிக்கிறது" என பிரதமர் மோடி ட்விட்டரில் பதிவிட்டுள்ளார்.

"அமெரிக்க ஓபன் மகளிர் இரட்டையரில் பட்டம் வென்றமைக்காக இதயம் கனிந்த வாழ்த்துகள் சானியா மற்றும் ஹிங்கிஸ். அற்புதம்" என குடியரசுத் தலைவர் பிரணாப் முகர்ஜி ட்விட்டரில் பதிவிட்டுள்ளார்.

இதேபோல், அரசியல் தலைவர்களும் பிரபல விளையாட்டு வீரர்களும் சானியா ஜோடிக்கு தங்கள் வாழ்த்துகளைத் தெரிவித்தனர்.