ஜோ ரூட் சதம்; இங்கிலாந்து- 373/6

மேற்கிந்தியத் தீவுகளுக்கு எதிரான 2-வது டெஸ்ட் கிரிக்கெட் போட்டியின் 3-வது நாள் ஆட்டநேர முடிவில் இங்கிலாந்து தனது முதல் இன்னிங்ஸில் 124 ஓவர்களில் 6 விக்கெட் இழப்புக்கு 373 ரன்கள் குவித்தது.

மேற்கிந்தியத் தீவுகளின் செயின்ட் ஜார்ஜ் நகரில் நடைபெற்று வரும் இந்தப் போட்டியில் முதலில் பேட் செய்த மேற்கிந்தியத் தீவுகள் தனது முதல் இன்னிங்ஸில் 104.4 ஓவர்களில் 299 ரன்கள் சேர்த்து ஆட்டமிழந்தது. அந்த அணியில் அதிகபட்சமாக மார்லான் சாமுவேல்ஸ் 103 ரன்கள் குவித்தார்.

பின்னர் முதல் இன்னிங்ஸை ஆடிய இங்கிலாந்து 2-வது நாள் ஆட்டநேர முடிவில் 26 ஓவர்களில் விக்கெட் இழப்பின்றி 74 ரன்கள் எடுத்திருந்தது. கேப்டன் அலாஸ்டர் குக் 37, ஜொனாதன் டிராட் 32 ரன்களுடன் களத்தில் இருந்தனர்.

முதல் விக்கெட்டுக்கு 125

3-வது நாளான வியாழக்கிழமை தொடர்ந்து ஆடிய இங்கிலாந்து அணியில் குக் 135 பந்துகளிலும், டிராட் 137 பந்துகளிலும் அரை சதமடித்தனர். அந்த அணி 49.2 ஓவர்களில் 125 ரன்கள் எடுத்திருந்தபோது டிராட் ஆட்டமிழந்தார். 147 பந்துகளில் 7 பவுண்டரிகளுடன் 59 ரன்கள் எடுத்த டிராட் பிஷூ பந்துவீச்சில் பிளாக்வுட்டிடம் கேட்ச் ஆனார்.

இதையடுத்து களமிறங்கிய கேரி பேலன்ஸும் சிறப்பாக ஆடி ரன் சேர்க்க, இங்கிலாந்து 159 ரன்களை எட்டியபோது குக் ஆட்டமிழந்தார். அவர் 211 பந்துகளில் 8 பவுண்டரிகளுடன் 76 ரன்கள் எடுத்து கேபிரியேல் பந்துவீச்சில் போல்டு ஆனார். பின்னர் வந்த இயான் பெல் 1 ரன் மட்டுமே எடுத்தார்.

4-வது விக்கெட்டுக்கு 165

இதையடுத்து பேலன்ஸுடன் இணைந்தார் ஜோ ரூட். இந்த ஜோடி சிறப்பாக ஆட, 78 ஓவர்களில் 200 ரன்களை எட்டியது இங்கிலாந்து. கேரி பேலன்ஸ் நிதானமாக ரன் சேர்க்க, மறுமுனையில் வேகமாக ஆடிய ஜோ ரூட் 69 பந்துகளில் அரைசதத்தை எட்டினார்.

அவரைத் தொடர்ந்து பேலன்ஸ் 129 பந்துகளில் அரைசதம் கண்டார். இதன்பிறகு இந்த ஜோடி வேகமாக ரன் சேர்க்க, 100 ஓவர்களில் 303 ரன்கள் குவித்தது இங்கிலாந்து. அந்த அணி 329 ரன்களை எட்டியபோது கேரி பேலன்ஸ் 77 ரன்கள் எடுத்து சாமுவேல்ஸ் பந்துவீச்சில் போல்டு ஆனார். இந்த ஜோடி 4-வது விக்கெட்டுக்கு 165 ரன்கள் குவித்தது.

பின்னர் வந்த மொயீன் அலி ரன் ஏதுமின்றி வெளியேற, பென் ஸ்டோக்ஸ் களம்புகுந்தார். கெமர் ரோச் வீசிய 111-வது ஓவரில் இரு பவுண்டரிகளை விளாசிய ஜோ ரூட் 125 பந்துகளில் சதத்தை எட்டினார். இது அவருடைய 6-வது டெஸ்ட் சதமாகும். இதனிடையே பென் ஸ்டோக்ஸ் 8 ரன்களில் வெளியேற, ஆட்டநேர முடிவில் 124 ஓவர்களில் 6 விக்கெட் இழப்புக்கு 373 ரன்கள் குவித்தது இங்கிலாந்து. ஜோ ரூட் 165 பந்துகளில் 2 சிக்ஸர், 13 பவுண்டரிகளுடன் 118 ரன்களும், ஜோஸ் பட்லர் 4 ரன்களும் எடுத்து களத்தில் உள்ளனர்.

மேற்கிந்தியத் தீவுகள் தரப்பில் கேபிரியேல், பிஷூ ஆகியோர் தலா 2 விக்கெட்டுகளை வீழ்த்தினர்.