2018 ஆங்கிலப் புத்தாண்டு பொதுப்பலன்கள் - மீனம்

விருப்பு, வெறுப்பின்றி நடுநிலையோடு செயல்படும் நீங்கள் மனதில் பட்டதை பளிச்சென்று பேசுபவர்களே! முயற்சி ஸ்தானமான 3-வது ராசியில் இந்த 2018-ம் ஆண்டு பிறப்பதால் சவாலான காரியங்களையும் சாதுர்யமாக முடித்து வெற்றி பெறுவீர்கள். வர வேண்டிய பணமெல்லாம் கைக்கு வரும். வருங்காலத்துக்காகச் சேமிக்கத் தொடங்குவீர்கள். புத்தாண்டின் தொடக்கம் முதல் 02.10.2018 வரை குரு பகவான் 8-ம் வீட்டில் நிற்பதால் பணம் எவ்வளவு வந்தாலும் எடுத்து வைக்க முடியாதபடி செலவுகள் துரத்தும். வீண்பழிச் சொல்லுக்கு ஆளாவீர்கள். ஆனால், 14.02.2018 முதல் 10.04.2018 வரை விசாகம் நட்சத்திரம் 4-ம் பாதத்தில் அதிசார வக்கிரத்திலும் மற்றும் 3.10.2018 முதல் வருடம் முடியும்வரை குரு 9-ம் வீட்டில் சென்று அமர்வதால் எதிலும் வெற்றி பெறுவீர்கள். கவுரவப் பதவிகள் தேடி வரும்.

திருமணம், சீமந்தம் போன்ற சுப நிகழ்ச்சிகள் வீட்டில் நடக்கும். மனைவியுடன் இருந்த மோதல்கள் நீங்கும். ஏளனமாகவும் இழிவாகவும் திட்டியவர்களெல்லாம் இனி உங்களைப் பாராட்டுவார்கள். பூர்விகச் சொத்தைச் சீரமைப்பீர்கள். தாய்வழியில் இருந்த மனக்கசப்புகள் நீங்கும். எதிர்பார்த்துக் காத்திருந்த வெளிநாட்டுப் பயணம் சாதகமாக அமையும். இந்தாண்டு முழுக்க உங்களிடம் மறைந்து கிடந்த திறமைகள் வெளிப்படும். பணபலம் கூடும். பொது விழாக்களைத் தலைமையேற்று நடத்துவீர்கள். சொத்து சம்பந்தப்பட்ட பிரச்சினைகளுக்குச் சாதகமான தீர்வு கிடைக்கும். வெளிநாட்டிலிருக்கும் உறவினர், நண்பர்களால் திடீர் திருப்பங்கள் ஏற்படும். கும்பாபிஷேகத்தில் முதல் மரியாதை கிடைக்கும். அரசுக் காரியங்கள் சாதகமாக முடியும். வழக்கில் வெற்றி பெறுவீர்கள்.

இந்த ஆண்டு தொடக்கம் முதல் 13.01.2018 வரை சூரியனுடன் சனியும் சேர்ந்திருப்பதால் எதிர்பாராத பணவரவு உண்டு. 10.03.2018 முதல் 02.05.2018 வரை சனியுடன் செவ்வாய் சேர்ந்திருப்பதால் உத்தியோகத்தில் மேலதிகாரியுடன் பனிப்போர் வந்து நீங்கும். 03.05.2018 முதல் 30.10.2018 வரை செவ்வாய் கேதுவுடன் இணைந்திருப்பதால் பழைய கடனை அடைக்க வழி பிறக்கும். அயல்நாட்டிலிருக்கும் உறவினர்கள், நண்பர்களால் உதவிகள் கிடைக்கும். வேற்றுமொழி, மதத்தவர்களால் ஆதாயமடைவீர்கள். 5.7.2018 முதல் 1.8.2018 வரை சுக்ரன் 6ல் நிற்பதால் டி.வி., ஃப்ரிட்ஜ், வாஷிங் மெஷின் போன்ற சாதனங்கள் பழுதாகும். சைனஸ் இருப்பதைப் போன்ற லேசாக தலை வலி வந்துபோகும்.

செவ்வாய் 8-ல் நிற்கும்போது இந்தாண்டு பிறப்பதால் உடன்பிறந்தவர்களுடன் மனஸ்தாபங்கள் வரும். பழைய கசப்பான சம்பவங்களை அடிக்கடி பேச வேண்டாம். இந்த ஆண்டு முழுக்க ராகு உங்கள் ராசிக்கு 5-ம் வீட்டில் நிற்பதால் தாய்வழி உறவினர்களிடையே மனஸ்தாபங்கள் வெடிக்கும். பூர்விகச் சொத்துக்காக அதிகம் செலவு செய்ய வேண்டி வரும். கேது உங்கள் ராசிக்கு 11-ம் வீட்டில் அமர்வதால் வெளிவட்டாரத்தில் செல்வாக்குக் கூடும்.

வியாபாரத்தில் புது ஒப்பந்தங்கள் கையெழுத்தாகும். போட்டியாளர்களுக்குப் பதிலடி கொடுக்கும் வகையில் அதிரடியாகச் செயல்படுவீர்கள். கூட்டுத் தொழிலில் பிரச்சினை தந்த பங்குதாரரை மாற்றுவீர்கள். உத்தியோகத்தில் புதுச் சலுகைகள், சம்பள உயர்வும் உண்டு. உங்களை நம்பி முக்கியப் பொறுப்புகளை ஒப்படைப்பார்கள். அலுவலகச் சூட்சுமங்களை விரல் நுனியில் வைத்திருப்பீர்கள்.

சின்னச் சின்ன சிக்கல்கள், சுகவீனங்கள் இருந்தாலும் பெரிய சாதனைகளைப் படைக்கத் தூண்டும் வருடமிது.

பரிகாரம்: ஈரோடு மாவட்டம், பெருந்துறை எனும் ஊரில் கோயில் கொண்டிருக்கும் ஸ்ரீகோட்டை முனீஸ்வரரை ஞாயிற்றுக்கிழமைகளில் சென்று வணங்குங்கள். வயோதிகர்களுக்குக் குடையும் காலணிகளும் வாங்கிக் கொடுங்கள். இந்தப் புத்தாண்டில் செல்வ வளம் பெருகும்.