டெல்லி மாநகராட்சி தேர்தல்: 137 வார்டுகளில் பாஜக வெற்றி; ஆம் ஆத்மிக்கு பெரும் பின்னடைவு

டெல்லி மாநகராட்சி தேர்தலில் பாஜக 137 வார்டுகளில் வெற்றி பெற்றுள்ளது. இது ஆளும் ஆம் ஆத்மி கட்சிக்கு பெரும் பின்னடைவை ஏற்படுத்தியுள்ளது.

ஏப்ரல் 22-ம் தேதி நடைபெற்ற டெல்லி முனிசிபல் கார்ப்பரேஷன் தேர்தலில் பதிவான வாக்குகள் இன்று (புதன்கிழமை) காலை எண்ணப்பட்டது. ஆரம்பம் முதலே பாஜக முன்னிலை வகித்துவந்தது.

பிற்பகல் 2 மணி நிலவரப்படி பாஜக 137 வார்டுகளில் வெற்றி பெற்றுள்ளது. இது ஆளும் ஆம் ஆத்மி கட்சிக்கு பெரும் பின்னடைவை ஏற்படுத்தியுள்ளது.

முனிசிபல் கார்ப்பரேஷன் ஆப் டெல்லி(எம்.சி.டி) எனப்படும் டெல்லி மாநகராட்சியின் தேர்தல் மிகவும் முக்கியமானதாகக் கருதப்படுகிறது. கடந்த 22-ம் தேதி தேர்தல் நடைபெற்றது. மொத்தம் 270 வார்டுகளுக்கு நடைபெற்ற தேர்தலில் 53.58% வாக்குகள் பதிவானது. அதாவது மொத்தம் 71.39 லட்சம் வாக்குகள் பதிவானது.

வாக்கு எண்ணிக்கை விவரம்:

11.59 am: டெல்லி காங்கிரஸ் தலைவர் அஜய் மகேன் ராஜினாமா.

11.45 am: விஷ்வாஸ் நகர், ஐபி விரிவாக்கம், ப்ரீட் விஹார், முகர்ஜி நகர், ஜிடிபி நகர் ஆகிய இடங்களில் பாஜக வெற்றி.

வடக்கு டெல்லியில் பாஜக 12 இடங்களிலும், ஆம் ஆத்மி 3 இடங்களிலும், காங்கிரஸ் 4 இடங்களிலும் வெற்றி.

11.40 am: பாஜகவின் மீனாட்சி வடக்கு டெல்லியின் கோஹட் என்கிளேவ் பகுதியில் வெற்றி.

11.30 am: கிழக்கு டெல்லியின் சடாத்பூரில் பாஜகவின் மீடா பிஷ் வெற்றி பெற்றுள்ளார். 2576 வாக்குகள் வித்தியாசத்தில் கரம்புராவில் பாஜகவின் சுனிதா வெற்றி. லட்சுமி பார்க்கில் காங்கிரஸ் வெற்றி.